DAGSÊ VRIENDE

Fred Fisagie skryf: Ek stuur vir jou ’n ou pennevruggie. Miskien kan jy dit in Hoor-Hier! gebruik. Die blaadjie loop mooi en ek stuur dit gereeld vir my dogter in "Transvaal".

(Dankie vir die briefie en die pennevruggie. Ek plaas dit graag. As jy vir my jou dogter in "Transvaal" se posbus gee, plaas ek haar op my verspreidingslys! Red.)

Manda Lang skryf ’n lekker briefie vir my daar uit Omaruru:

Vandat ek 18 jaar gelede in die destydse Suidwes-Afrika aangekom het, pla die sogenaamde "hin" teenoor "’n" my vreeslik. Ons Transvalers (Vaalpense is mos altyd gespot oor ons "a" wat ons glo "ô" uitspreek)... maar die ding van "hin kat sit in hin boom" in plaas van "‘n kat sit in ’n boom" pla my al lank. Totdat my dogter in Graad 1 instap en haar (voorheen-van-die-Kaap) onderwyseres hulle ook begin leer van "hin"... Toe sit ek my voet neer. So is my dogtertjie (nou al in Graad 3) die enigste leerling wat "’n" lees in plaas van "hin"! Sy is ook baie trots daarop! Verder praat al ons leerlinge van EKKE gaan loop slaap. Waar kom hierdie ekstra –ke en "loop" vandaan? Ek wonder maar net!

(Ekke loop en wonder mos nou self! Kan iemand help?! Red.)

Ek ontvang die volgende heerlik inspirerende brief van Pieter Pieterse daar uit Stompneusbaai. Hy skryf:

IN DIE KAMER LANGSAAN... deur Anna-Marie Steenkamp

Klik hier om Anna-Marie Steenkamp se bydrae te lees: In die Kamer langsaan...

KRIT

Op Dinsdag, 4 Augustus gesels ons oor Pieter Cilliers se outobiografiese werk: ’n Kas is vir klere. Lizanne Kruger van Omaruru werk al geruime tyd aan ’n studie oor die homoseksuele persoon in Namibië. Sy sal die gesprek oor hierdie boek inlei.

In die twee Kritbesprekings wat daar nog vir 1998 oor is, bespreek ons:

Op 22 September In drie riviere deur Jaco Botha en
op 27 Oktober Landskap met vroue en slang deur Lettie Viljoen.

Hierdie besprekings vind telkens op ’n Dinsdagaand, om 19:30 by die kantore van Windhoek Consulting Engineers in Bismarckstraat plaas. Navrae kan aan Susan Alexander gerig word.

WORD RUSTIG VIR EEN MINUUT

Ek lees onlangs in Solly Ozrovech se boek, Van dag tot dag deur God gedra, die volgende gebed van ’n bejaarde:

"Goeie Meester, leer my die kosbare les dat dit van tyd tot tyd moontlik is dat ek verkeerd kan wees. Hou my redelik aangenaam. Ek wil nie ’n heilige wees nie, sommige van hulle is so moeilik om mee saam te leef – maar: ’n suur oumens is een van die bekroonde werke van die Satan. Maak my bedagsaam, maar nie buierig nie; hulpvaardig, maar nie baasspelerig nie. Met my onbeperkte voorraad van wysyheid lyk dit na ’n ramp om dit nie te gebruik nie, maar U weet, o Here, dat ek aan die einde ’n paar goeie vriende wil behou."

LAAT ONS VAN JOU HOOR!

Ek sal graag wil weet wat julle dink van die "nuwe" voorkoms van ons blaadjie! Met die eerste verjaarsdag van Hoor-Hier! om die draai, het ek gedink ons kan gerus ’n bietjie werk aan die uiterlike!

Groete tot volgende keer.