Dagsê Vriend

Soos julle sien het ons 'n naam gekry. Vir die wat nou vra: "Hoe sê?" is my antwoord: "Hoor-Hier! Kry vir jou 'n gehoorapparaat én 'n nuwe bril!" Baie geluk aan Fred Visagie vir die lekker-op-die-tong-naam. Soos belowe, kry Fred 10 gratis kopieë van hierdie blaadjie.

Lesersbriewe

Het u gehoor dat die Kahalari nie Engels kan praat nie? Só vertel mnr. J.A. van den Berg die storie:

Op 'n goeie dag het iemand een van die Hobsonbroers (van Kees van die Kalahari-faam) gevra: "Waarom skryf julle nie in Engels nie?" Die antwoord was: "Omdat die Kalahari nie kan Engels praat nie!"

Afrikaans is 'n inheemse taal, 'n Afrika-taal. Vra maar vir Arnoldus Pannevis, die onderwyser uit Holland wat vir 'n ossewa-reisgeleentheid na die Paarl in Du Toits Losieshuis in Kaapstad gewag het. Hy vra toe vir iemand: "Watter taal spreek u hiertelande?"    "Nederlands," antwoord sy tafelgenoot.   "Nee," sê Pannevis, "ik ben pas van Nederland gekome, dat is geen Nederlands."

(Baie dankie vir u belangstelling en die interessante bydraes! Red.)

Mev JM Ellis van Maltahöhe skryf sy het "oor die draadloos" gehoor van ons blaadjie en "baie geluk met die geboorte." Sy stuur 'n gediggie oor Vriendskap. Ek plaas 'n kort uittreksel:

Vriendskap is 'n goue ketting...
Dit word soos duur juwele
gekoester en waardeer

(Sonder vriendskap sal ons ou wêreld nog valer en stowweriger lyk, nie waar nie! Red.)

Marie Becker van Okahandja het weer 'n paar pittighede uit die pront-Afrikaanse monde van haar hoërskoolleerlinge: Een van die kinders wil iets aan my verkoop. Ek is toe oortuig dat die ding gesteel is en sê: "Waar het jy dit gesteel; onthou, steel is sonde." "Nee," sê hy, "ek het dit op Tsumeb gekry by 'n winkel; maar dit was nie steel nie. Steel is sonde, maar gou-vat nie!"

Sy skryf ook oor 'n ander uitdrukking wat redelik bekend is in Namibië: "Die meisie en haar kêrel het stoutgemaak, dis dié dat sy nou swanger is!"

Weet julle wie en wat is CLAVIS?

Krit

Alhoewel die laaste literêre gesprek vir 1997 reeds plaasgevind het, kan belanstellende lesers dalk al begin proe aan 'n paar tekste wat moontlik volgende jaar aan die beurt kan kom:
'n Staning onder sterre deur George Weideman
Julia se broer deur Annelize van Rooyen
Die Reuk van Steenkool deur SP Benjamin
'n Kas is vir klere deur Pieter Cilliers
Lekker lees!

DIE OOG VAN DIE KAT

I
Jakobus loop!
Die kat lê doodstil en loer
na die gedoente in die middel van die vloer;

self swaartekrag verslap
as toegewing vir die heel gewigtigste stap;

by die ruit hou die wind asem-op
maar hy kom op krom bene vanself regop

en Jakobus draf
sy eerste strompeltree na die graf.

III
Bloedvete
Die seunskind klits die kat
- bek vol vere en bloed -
met die Remington .22
van die duiwehok af.

My meisiekind voed
die weeswerpsel
met eiergeel room
- maak die dood groot.
             Chris Coetzee

Chris Coetzee is in September aangewys as die algehele wenner van die romanwedstryd wat De Kat en Sanlam aanbied saam met Queillerie, radiosondergrense, SAL en die Stigting vir die Skeppende Kunste. Die titel van die wenroman: Wat het geword van Generaal Mannetjies Mentz? Ons sien uit na die verskyning van hierdie roman in die pers.

LAAT ONS VAN JOU HOOR!

Ek besef my Novemberuitgawe is effe laat! Ek begin onmiddellik met die Kersblad. Intussen hou ek die posbus, faksmasjien en E-pos dop vir bydraes!

Groete!